Azken egunotan, TOPIC-ek elementu berri bat gehitu dio bere bilduma zabal eta dinamikoari. Samuel “Sam” Ortí animazio-zuzendari valentziarrak eta haren ekoiztetxeak, Conflictivos Productions-ek, ‘La habitación de Damian’ izeneko pieza eman diote zentroari.

Modelatzeko buztinez egindako lan zehatz eta landua da, ‘Pos eso’ (2014) film luzerako sortua —hau da, “Sam” Ortíren film ezagunena—. Stop-motion animazioan, material moldagarriz egindako figurak erabiltzen dira; eskuz mugitu eta fotogramaz fotograma argazkiak ateratzen zaizkie, eta, ondoren, ohiko abiaduran erreproduzitzean, mugimenduaren ilusioa sortzen da. Kasu zehatz honetan, piezak Damián txiki deabruaren gela irudikatzen du —munstroz betea—. Damián da filmeko protagonista, eta ohean etzanda dago, apezpiku baten zain, hark exorzismo bat egin diezaion.

‘La habitación de Damián’ pieza Donostia Kulturak eta Donostiako Fantasiazko eta Beldurrezko Zinemaren Asteak antolatutako ‘Gabinete de curiosidades, monstruos y máquinas’ erakusketan egon zen ikusgai. Erakusketa hori duela astebetera arte egon zen zabalik Donostiako Okendo Kultur Etxean.