Erakusketaren helburua txotxongiloak dituzten maskara horiek ezagutaraztea eta erakustea da, ez baitira oso ohikoak publikoaren artean. Erakusketa martxoaren 3an, larunbatean, hasiko da eta ekainaren 10era arte egongo da zabalik.

Mota horietako maskarak buruan jartzen dira, kasko baten moduan, eta haren gainean, txotxongilo edo panpina artikulatu batzuek askotariko eszenak irudikatzen dituzte: satirikoak, erlijiosoak, nolabait garaikideak, mendebaldeko eragina dutenak edo egunerokotasunekoak. Zenbait kasutan, maskarek gizon edo emakume baten burua baino ez dute irudikatzen, baina, normalean, giza irudien adierazpen konplexuak izaten dira, zapi, animalia edo beste tresna batzuk buru gainean dituztela. Dantzan darabiltzaten maskarak ugariak dira, baita lantzen dituzten gaiak ere.

Txotxongilorik gabeko maskarak ere aurki daitezke bilduma honetan, batik bat jaialdiaren gau partean erabiltzen direnak (Efe). Gau maskara horiek bildumara gehitu dira oso bitxiak direlako eta jaialdiaren nondik norakoak hobeto ezagutzeko.

Estiloari dagokionez, maskara gehienek Anago Yoruban dute jatorria, Beningo hego-ekialdeko eta Nigeriako hego-mendebaldeko kostaldean, hain zuzen ere. Gelede antzerkia Benin, Nigeria eta Togoko yoruba-nago komunitateak lantzen du. Duela mende bat baino gehiago, ospakizun horrek Iyà Nlà ama nagusiari eta yoruba gizartearen garapenean eta giza-antolaketan emakumeek egiten duten lanari gorazarre egitea du helburu. Gelede-a uztaren ondoren ospatzen da, gertakari garrantzitsuen aitzakian, baita lehorte edo izurrite kasuetan ere. Ikuskizunean, zizelkatutako maskara horiekin yoruberaz kantatu eta yoruba-nag herriaren historia eta mitoak kontatzen dira.