Hori dela eta, beren karakterizazioa bereizia da, ez dira inondik inora kasualitatezkoak. Formei eta koloreei dagokienez, itxura berezia dute, apainketaren eta itxura fisikoaren xehetasun bakoitzak du bere esanahia. Erakusketara gerturatzen diren bisitariek txotxongilo eder eta preziosistak ikusteko aukera izango dute.

Wayang antzerki tradizional bat da, Bali, Java, Sunda eta Javaren eraginpean dauden Indonesiako eta Malaysiako eskualdeetan ezaguna dena. Diotenez, jatorrian “itzal” esan nahi zuen haren izenak eta, beraz, itzalen antzerkiari egiten zion erreferentzia. Wayang antzerkia Gizateriaren Ahozko Ondare Ez-material izendatu zuen Unescok 2008. urtean, eta herrialde haren nortasun ikur bihurtu da, nahiz eta oraindik bizirik dauden eskualdeen araberako zenbait aldaera.

‘Wayang Golek’ antzerkian hagaxka-txotxongiloak erabiltzen dituzte, eta burua eta gorputza elkarri lotzen dizkion ardatz nagusi baten bidez eta beso bakoitzean duten hagaxkaren bidez mugitzen dira. Pertsonaiak aurpegiaren eta burukoaren arabera bereizten dira. Jainkoak (dewa / batara), nobleak (satria), tximuak (wanara), erraldoiak (raksasa) eta deabruak (buta). Guztiek dituzte elementu komunak, makillajean, burukoan zein soinekoan.