Titereszena 2026-2027ko egitarau berria prentsaurreko batean aurkeztu da. Denboraldiak jarduera-sorta zabala hartuko du barne: emanaldiak, erakusketak, eskola kanpaina bat, bisita gidatuak eta antzeztuak, tailerrak eta bestelako ekitaldiak.

Urrian hasiko da denboraldia, erakusketa berri baten inaugurazioarekin: “Rut Olabarri: trukatua eta akastuna”. Aldi baterako erakusketen aretoan egongo da ikusgai, urriaren 8tik 2027ko martxoaren 7ra arte. Rut Olabarriren jarduna ehunak, memoria eta fikzioa elkarrekin uztartzen diren eremutzat har daiteke, azkenean bereiztezin bihurtzeraino. Era berean, urrian —eta azaroan zehar jarraituz—, “Memoriaren hariak: hezkuntza artistiko feminista” izeneko tailerra egingo da, Andoaingo Udalarekin lankidetzan.

Emanaldien egutegia abenduaren 12an hasiko da, Les Pinyes konpainia katalanaren “Ogi zati bat” lanarekin. Ondorengo ikuskizunen artean honako hauek daude: “Malaika”, La sonrisa del lagarto taldearena (Asturias), urtarrilaren 16an; “Flor de greguerías”, Luna Danza Teatrorena (Madril), otsailaren 27an; eta “Monstruo arrosa”, Zum Zum taldearena (Katalunia), martxoaren 13an. Apirilaren 24an, Anita Maravillasen (Euskal Herria) “Tretatxu” aurkeztuko dugu, eta maiatzaren 15ean, Alas Circo Teatroren (Andaluzia) “El circo de los gerundios”. Mahai gaineko txotxongiloak, objektuak, itzal-antzerkia, animazioa eta beste teknika batzuk erabiltzen dituzten emanaldiak eskainiko ditugu.

Tailerrek garrantzi handia izango dute berriro ere; baita 2026ko abendutik 2027ko maiatzera bitartean garatuko den eskola-programak ere. Hezkuntza-ekimen horrek barne hartzen ditu txotxongilo-ikuskizunak (artistekin hiketaldiak), talde bakoitzera egokitutako tailerrak eta museo-bisitak. Eta ez dezagun ahaztu Titirijai jaialdia; azaroaren 21etik 29ra egingo dena, “Ez izan automata” lelopean.