2009an Tolosako Txotxongiloen Nazioarteko Zentroa ireki zenetik, aldi baterako zazpigarren erakusketa da, eta Frantziako Cannes hiriko Artekal konpainia-tailerrari eskainia dago. Bertan, kalitate artistiko handia duten 150 pieza daude ikusgai.

Arketal konpainiak Greta Bruggeman eta Sylvie Osman ditu zuzendari, eta erakusketa, bereziki, piezen edertasunagatik eta erabilitako materialen plastikotasun eta moldakortasunarengatik nabarmentzen da. Gretta Bruggemanek, Arketaleko arduradunetako batek, uste du erakusketa hau ikustera joaten diren bisitarientzat interesgarria suerta daitekeela ezagutzea taldeak zer nolako modu berezian egiten duen lan. Marius Rech da taldearekin lankidetzan aritzen den margolari eta artistetako bat, eta bera ere Tolosan izan da erakusketaren muntaian.