42. Titirijai Jaialdia

Aurten, Onírica Mecánica konpainiaren Verne bezalako ikuskizunez gozatu ahal izango dugu, TOPICen artista egoitza izan zuena. Tolosa harrotasunez izango dugun beste lan bat Guillem Albà-ren Mà Solitud da. Edizio honetan Tolosan hartuko ditugun nazioarteko konpainiak Italia jatorriko Zaches Teatro eta DiFilippo izango dira. Eta Frantziatik La Loquace eta l’Alinéa etorriko dira. Kaleetan Zurrunka konpainiaren Bidakolore ikuskizun ibiltariarekin eta DiFilippo konpainiaren Pluma ikuskizunarekin topo egingo dugu.

Betiko moduan, publiko eta adin guztientzako ikuskizunez gozatzeko aukera izango dugu, baita TOPICen eta Leidorren ikasleei zuzendutakoak ere. Sektoreko profesionalekin topaketak eta jardunaldiak izango ditugu eta l’Estaquirot Teatre konpainia bere 50 urteko ibilbideagatik omenduko dugu. Formazioari dagokionez, UNIMA Euskal Herriarekin antolatutako Udazkeneko Eskola izango dugu, eta aurten Txotxongilo eta Objektu Antzerkiaren eszena sorkuntzan zentratuko da, Zaches Teatro konpainiako zuzendaria den Luana Gramegnak emango duena.

Eta espero bezala, edizio hau TITIRIJAIren 42 urte hauetan oso garrantzitsuak izan diren bi pertsonari eskainiko diegu: Antxon Elosegi eta Txetxo Gaztañaga. Txotxongiloen festa Tolosan ospatzeko zain egongo gara, baina ez ahaztu datak gordetzea, jaialdi zirraragarri bat dugu zain!