Erakusketaren balio nagusiena “aurkezten duen ikuspegia da. Narrazio-diskurtso batean zentratzen da, Mendebaldean sekulan egin ez dena”. Txinako txotxongiloen antzerki tradizionalaren istorioak aldatzen joan ohi dira, baina, pertsonaiak, aldiz, berdin mantentzen dira. Horiek ezaugarri, keinu eta itxura berezia dute, eta ikusle txinatarrek erraz antzematen dituzte, antzerki bakoitzean kontatzen den edukia edo istorioa edozein dela ere. Sortzaile bakoitzak bere osagai eta ukitu pertsonala du, baina ez da inoiz oinarrizko ezaugarri horietatik aldentzen. Erakusketa honetan, beraz, sei arketipo horien arteko ezberditasunak azaleratzen eta nabarmentzen dira, eta, horretarako, Simon Wong, Hong Kongeko Ming Ri Institutuko zuzendariaren laguntza izan dugu.