Orduz geroztik, agerpen asko izan diztuzte: 1995ean, esaterako, ‘¿Matamos al Dragón? eta ‘Almogavares’ lanak ekarri zituzten; 1996an ‘Fábula de la raposa’; 1999an ‘Retablo de Navidad’; 2006an ‘El hombre cigüeña’ eta 2009an ‘No nos moverán’ ikuskizunarekin TOPIC-eko inaugurazioan parte hartu zuten. Oro har, Tolosako ikusleak bereganatu ditu, baita gipuzkoarrak ere, Donostiako Musika Hamabostaldian behin baino gehiagotan eskaini dituen ikuskizunei esker.

Eszenatokietan egin dituen lanez gain, zazpi disko eta hiru liburu editatu ditu konpainiak, eta, gainera, hogeita hamar ikuskizun baino gehiago estreinatu ditu hogeita hemezortzi herrialdetan. “Gure txontxogiloek herrialde ugari ezagutu dituzte: Andorra, Portugal, Frantzia, Italia, Hungaria, Alemania, Txekiar Errepublika, Finlandia, Suitza, Luxenburgo, Belgika, Maroko, Japonia, Palestina, Kolonbia, Ekuador, India, Mexiko, Taiwan, Brasil, Puerto Rico, Costa Rica, Kanada, Grezia, Zipre, Txina, Polonia, Lituania, eta Estatu Batuetan, Kalifornia, Atlanta, Washington, New York, New Orleans, Connecticut, Vermont eta Hollywood. Eta, nola ez, ia Espainiako eta Aragoiko txoko guztiak” dio Paco Apariciok.